希臘危機

livefreakss

希臘危機

希臘債務危機看似有解決方法， IMF與歐盟聯手向希臘注資，以三百億歐元打頭陣，算係暫濟燃眉之急，等希臘唔好在五月賴債（ default）先。 IMF注資，往往附帶好辣嘅條件，今次就會（一）限制公務員薪水，月入超過三千歐元，失去第十三、十四個月糧，（二）加稅，（三）退休福利減少，女性退休年齡由六十歲改為六十五歲，與男性看齊。
詳情不一而足，希臘工會已發動大罷工，抗議政府接受 IMF之苛刻條件。老實講，希臘及歐盟國家嘅公務員與一般勞工福利非常好，要佢哋勒緊肚皮，犧牲為國，勢係假。相比之下，一九九七年南韓人民排隊捐金畀政府救國，就知道歐洲亞洲情況好唔同。呢次輪到亞洲人心凉喇，歐豬國家人民有咁耐風流，仲唔要付出代價？ IMF過去只係向第三世界國家指手畫腳，今次睇吓在歐洲「先進國家」點樣表演削赤財技？
希臘政府負債纍纍，原來與國民逃稅、呃稅有關。 IHT於五月三日有一篇報道指，雅典北郊係豪宅區，有三百二十四位業主報稅時承認家有游泳池，稅務局最近利用衞星圖片，逐間數，結果在北郊找到有 16,974個有泳池，於此可見希臘人報稅係咁意，呃得就呃。另外，在雅典一個商業區，靚車處處可見， Prada、 Chanel等名牌分店林立，呢度有一百五十個醫生執業，有一半醫生報稅指年入少於三萬歐元，三十四位醫生話年收入少於一萬歐元──低於交稅之最低收入。整個希臘有一千一百萬人，只有幾千人報稅話收入超過十萬歐元一年！
希臘全國皆逃稅，地下經濟佔 GDP四分之一，故此政府要滿足 IMF條件，大力削減公共開支時，最受影響嘅就係公職人員，逃稅醫生一啲事都冇，唔怪得公務員工會要示威抗議。天真許來電討論希臘危機如何發展下去，左丁山認為債務危機暫除，政治危機加深，若希臘人大舉上街，發生類似泰國情況，民選政府垮台嘅話，誰人來執行 IMF嘅條件？拯救希臘會成為歐盟之惡夢，投資者不可輕視之。